تیمێکی شوێنەوار لە زانکۆی سلێمانی دۆزینەوەیەکی گرنگی لە نزیک سەرچناری شاری سلێمانی راگەیاند و دەڵێت کۆشکێکمان دۆزیوەتەوە تەمەنی 3500 ساڵە و تیایدا نوسینی مێخی و دوو ناوی کۆنیش دۆزراونەتەوە کە (داسی و بانو) بوون.
دکتۆر دڵشاد زاموا، مامۆستای زانکۆی سلێمانی و سەرۆکی تیمی پڕۆژەی شوێنەواری دێکۆن رایگەیاند، شوێنەوارێک لە نزیک رووباڕی سەرچنار و قولەرەیسی تەرخانکرابوو بۆ توێژینەوە و لەو شوێنەدا کۆشکێکی تەمەن 3500 ساڵە دۆزراوەتەوە.
ئاماژەی بەوەشکردووە، کۆشکەکە لەلایەن گەلی لولوەوە دروستکراوە کە دێرنترین گەلی ناوچەی پارێزگای سلێمانین و 5000 ساڵ لەمەوبەر لەم ناوچەیە ژیاون و دواتر تواونەتەوە و بوونەتە باپیرانی خەڵکی ئەم ناوچەیە.
ئەوەشی راگەیاند، لەناو کۆشکەکەدا هۆڵی پێشوازی پادشا و گەنجینە دۆزراونەتەوە و نوسینی مێخی لەسەر تابلۆیەک بوونی هەبووە لەگەڵ ژمارەیەک مۆر کە ناوی ژمارەیەک خوداوەندی لەسەر بووە و ژمارەیەک گۆزە کە کاریگەری گەلی کاشی و گەلی میتانیان لەسەر هەبووە و تەنانەت ئاسنیش دۆزراوەتەوە کە پێدەچێت لەمامەڵەکردندا بەکارهاتبن.
