ئەندامێکی لیژنەی دارایی ئەنجومەنی نوێنەرانی عێراق رایگەیاند، عێراق لە رێکارەکانی بەبانکیکردنی مووچە نیگەرانە و پێی وایە حکومەتی هەرێم کات دەکوژێت و ئەوەش بەشێکە لە هۆکاری دواخستنی مووچەی هێزە ئەمنییەکان.
سۆران عومەر، ئەندامی لیژنەی دارایی ئەنجومەنی نوێنەرانی عێراق رایگەیاند بەگوێرەی رێککەوتنەکانی نێوان حکومەتی عێراق و بانکی بازرگانیی عێراق، دەبوایە بانکی بازرگانیی عێراق دەستی بە بانکیکردنی مووچە بکردایە، بەڵام لەماوەی رابردوودا حکومەتی هەرێم تەنها 800 ناوێکی رادەستی بانکی بازرگانیی عێراقی کردووە و ئەوەش مانای وایە، نایانەوێت بانکەکە تەوتینی تەواوی مووچە بکات.
ئەندامەکەی لیژنەی دارایی ئاماژەی بەوەشکرد، حکومەتی هەرێم لە پای داهاتی نانەوتی داواکاری بودجەی بەکاربردن و بودجەی وەبەرهێنانی کردووە و 50%ی داهاتی باج و گومرگ دەداتە بەغداد و ئەوەش کێشەکەیە.
نەناردنی مووچەی هێزە ئەمنییەکان، بەهۆی ئەوەیە لیستی ناوی مووچەی هێزە ئەمنییەکان نەنێردراوە بۆ بەغداد و لە دوو مانگی رابردوو بەو جۆرە کە هاتووە، ئەوە بووە حکومەتی عێراق چاوپۆشی لێکردووە بەڵام ئێستا جەختی لێدەکاتەوە و دەبێت رێککەوتنی تەواو لەبارەی مووچەوە بکرێت لەنێوان هەردوولادا، سۆران عومەر وای وت.
وتیشی، “حکومەتی عێراق پێیوایە حکومەتی هەرێم روون و راشکاو نییە و ئاستەنگ دروست دەکات و نایەوێت بچێتە ژێر چەتری بڕیارەکانی دادگای فیدڕاڵیی عێراق”.
