ئازاد محەمەد ئەمین سەرۆكی ئەنجومەنی پارێزگای سلێمانی لە لێدوانێكدا بە تۆڕی میدیایی ئێستای راگەیاند، دوای دەركردنی رێنماییەكانی تایبەت بە یاسای بودجە بە دڵنیاییەوە هاوشێوەی پارێزگاكانی عێراق نرخی بەنزین بە 450 دینار بۆ پارێزگاكانی هەرێمی كوردستانیش دابیندەكرێت.
راشیگەیاند، لەگەڵ ژمارەیەك لە پەرلەمانتارانی كورد لە ئەنجومەنی نوێنەرانی عێراق كۆبوونەوەمان كردووە و ئاماژەیان بەوە كرد چاوەڕوانی دابەزاندنی رێنماییەكانی تاییەت بە یاسای بودجە دەكەن و بەدواداچوونی جددیی لەو بارەیەوە دەكەن كە هاوشێوەی پارێزگاكانی دیكەی عێراق بەنزین بەنرخی پاڵپشتیكراو بۆ هەرێمی كوردستان داببیندەكرێت، بەوپێیەی هەرێمی كوردستان نەوتەكەی رادەستی بەغداد دەكات.
ئاماژەی بۆ ئەوەش كرد، بەشێك لە نەوتی هەرێمی كوردستان بۆ پاڵاوگەكانی عێراق دەبێت و بەرهەمی ناوخۆی پێدابیندەكرێت بەوەش نرخی بەنزین لە هەرێمی كوردستان هاوشێوەی عێراق دەبێت، بەو مەرجەی هەرێمی كوردستان رێككەوتنەكەی لەگەڵ عێراق وەك خۆی جێبەجێبكات.
