سەرۆكی یەكێتی رایدەگەیەنێت، مامەڵەی تەندروست و نیشتمانییانە لەگەڵ کەرتێکی گرنگی وەک وزە ئامانجی ئێمەیە و دەمانەوێت ئەو سامانە نیشتمانییە لە خزمەت داهاتوویەکی سەقامگیرتر و ئاوەدانتردا بێت.
بافڵ جەلال تاڵەبانی، سەرۆکی یەکێتیی نیشتمانیی کوردستان لە واشنتن لەگەڵ پات رایان، ئەندامی لیژنەی خزمەتگوزارییە چەکدارەکانی ئەنجومەنی نوێنەران (ئەندامی لیژنەی دابینکردنی بودجە و هاوکاریی لۆجستی بۆ هێزی پێشمەرگە) کۆبووەوە.
سەرۆک بافڵ جەلال تاڵەبانی هەڵوێستی یەکێتی لەبارەی یەکخستنەوەی هێزەکانی پێشمەرگە و کەرتی وزە روونکردەوە و رایگەیاند، بەردەوامیی هاوکارییەکانی ئەمریکا و هاوپەیمانیی نێودەوڵەتیی فاکتەرێکی بەهێزی یەکخستنەوەی هێزی پێشمەرگە و پڕچەککردنێتی، بۆیە هیوادارین پشتیوانییەکان بەردەوامییان هەبێت.
وتیشی، “مامەڵەی تەندروست و نیشتمانییانە لەگەڵ کەرتێکی گرنگی وەک وزە، ئامانجی ئێمەیە و هەوڵی بۆ دەدەین، دەمانەوێت ئەو سامانە نیشتمانییە لە خزمەت داهاتوویەکی سەقامگیرتر و ئاوەدانتردا بێت و ببێتە مایەی خۆشگوزەرانی بۆ خەڵکەکەمان”.
