بۆ یەکەم جار لە هەرێمی کوردستان، نەخۆشخانەیەکی دەروونیی تایبەت بە بەخشراوانی ژنان کە نەخۆشی درێژخایەنیان هەیە، لە شاری سلێمانی کرایەوە بەناوی نەخۆشخانەی چرا و بڕیار وایە لەماوەی داهاتوودا لە شارەکانی هەولێر و دهۆکیش نەخۆشخانەیەکی هاوشێوە بکرێتەوە.
لە کۆنفڕانسێکی رۆژنامەنووسیدا کوێستان محەمەد، وەزیری کار و کاروباری کۆمەڵایەتی رایگەیاند، نەخۆشخانەکە بەبەهای 95 ملیار دینار لەسەر بودجەی حکومەتی هەرێم دروستکراوە و سەرجەم پێداویستییەکانی بۆ دابینکراوە و بەڕێوەبەرایەتی تەندروستیی سلێمانی سەرپەرشتی کردووە.
لەلایەکی دیکەشەوە، سامان بەرزنجی، وەزیری تەندروستیی هەرێم رایگەیاند، لە نەخۆشخانەکان کارمەندی تەندروستی و کارمەندی چاودێریی کۆمەڵایەتی و توێژەری دەروونی بوونیان دەبێت و چارەسەری پێویست بۆ نەخۆشانی دەروونی دەکرێت و دەرمانیان پێ دەدرێت و لە ژێر چاودێریدا دەبن، کە نەخۆشی درێژخایەنیان هەیە.
