نرخی جۆرە جیاوازەكانی بەنزین گران بوون و وتەبێژی بەنزیخانەكان هۆكارەكانی ئاشكرادەكات و دەشڵێت، لەهەمان كاتدا غاز هەرزان بووە.
بەهمەن شێخ قادر، وتەبێژی بەنزیخانەكانی سلێمانی بە تۆڕی میدیایی ئێستای راگەیاند، بەنزین لە هەریەك لە جۆرەكانی نۆرماڵ و سوپەر بۆ هەر لیترێك 50 دینار و موحەسەن 25 دیناری چووەتەسەر.
لەبارەی هۆكارەكانی بەرزبوونەوەی نرخەكەشی وتی، زیاد لە 20 رۆژە كەمی سووتەمەنی لەناو شاری سلێمانی هەیە، بەهۆی ئەوەی پشكەكانی حكومەتی عێراق و حكومەتی هەرێم، كە بە 750 دینار بوو، بڕدراوە و نەماوە.
ئەوەشی وت، “بەشێك لە پاڵاوگەكانی وەك كەڵەك، بێجی و ئۆنێكس شەت داون بوون. ئەمانەش وایكرد بەنزین لە بازاڕی بازرگانیدا كەمببێتەوە و خواست لەسەری زیاد بكات”.
وتەبێژی بەنزینخانەكان باسی لەوەشكرد، بەرزبوونەوەی نرخی دۆلار و بەرزبوونەوەی بۆرسەی جیهانیش، سەرجەمیان پێكەوە لەماوەیەكی دیاریكراودا كۆبوونەوە و پێكەوە بوونەهۆی بەرزبوونەوەی نرخی بەنزین.
لەگەڵ ئەوەشدا روونیكردەوە، غازی (LPG) بە پێچەوانەی بەنزینەوە نرخەكەی لە 450 بۆ 425 دابەزی، كە هۆكارەكەی ئەوەیە لە ناوخۆدا بەردەستە و رۆژانە لە كۆرمۆرەوە بە بڕێكی زۆر رەوانەی بازاڕ دەكرێت.
