سەرۆکی هەرێمی کوردستان لە میانی کۆنفڕانسی گۆڕانی کەشوهەوا قسەی کرد، لە بەشێکی قسەکانیدا جەختی لە هەوڵەکان لە چارەسەرکردنی کێشەکانی نێوان حکومەتی هەرێم و حکومەتی عێراق کردەوە و وتی، “چاوەڕوانی حکومەتی فیدڕاڵیین بۆ جێبەجێکردنی ئەرکەکانی بەرامبەر بە هەرێمی کوردستان.”
نێچیرڤان بارزانی، سەرۆکی هەرێمی کوردستان رایگەیاند، لەماوەی چەندین هەفتەی رابردوودا هەنگاوی کردەیی و باش نراوە لەلایەن حکومەتی هەرێمی کوردستانەوە بە ئاڕاستەی چارەسەرکردنی کێشەکان و هەنگاوەکان کاریگەری و رەنگدانەوەی ئەرێنی دەبێت لەسەر پەیوەندییەکانی نێوان هەرێم و بەغداد.
سەرۆکی هەرێم وتیشی، “داوا دەکەین حکومەتی عێراق بەدەم کێشەکانەوە بێت و کێشەکان چارەسەر بکات، چونکە ئەوەی ئێستا هەیە، ئەوەیە کە دەبێت حکومەتی فیدڕاڵی ئەرکەکانی خۆی بەرامبەر بە حکومەتی هەرێم جێبەجێ بکات”.
جەختیشی لەوەکردەوە، بە کارکردنی پێکەوەیی، دۆخی خەڵکی هەموو عێراق باشتردەبێت و دەتوانرێت داهاتوو بۆ هەموومان باشتر ببێت.
دوای کۆنفڕانسەکە سەرۆکی هەرێمی کوردستان لێدوانی بۆ یەکێک لە میدیاکان داوە و رایگەیاندووە، بەمزووانە وادەی نوێ بۆ هەڵبژاردنی پەرلەمانی هەرێمی کوردستان رادەگەیەنن.
