توێژینەوەیەک: دواکەوتن لە کار و چاوپێکەوتنەکان سودی هەیە

زانایانی زانکۆی هارڤارد گەیشتوونەتە ئەو باوەڕەی “دواکەوتن” ی بەردەوام، نیشانەی نەرێنی و پێنەگەیشتنی کەسەکان نییە.

هەندێک کەس هەست بەو راستییە دەکەن کە بەردەوام لە کاتی کار و چاوپێکەوتنەکاندا دوادەکەون ئەوەش بەلای ئەو کەسانەوە کێشەیەکی نەرێنی و جددیە، بەڵام بەپێی توێژینەوەیەک کە لە ماڵپەڕی your tango، دا بڵاوکراوەتەوە، دواکەوتن لە کار و چاوپێکەوتنەکاندا رەنگە خەسڵەتێکی ئەرێنی بێت، و لەگەل ئەوەشدا چەند سودێکی هەیە:

– دڵەراوکێی کەمتر و تەمەنێکی درێژتر

بەپێی لێکۆڵینەوەکەی زانایان کە لە زانکۆی هارڤارد ئەنجامیانداوە، ئەو کەسانەی دوادەکەون لەکاتی کارکردن فشاری دەرونییان کەمترە و کۆکراوەترن، هەروەها هەست بە ئارامیی زیاتر دەکەن لەچاو ئەو کەسانەی زووتر دەگەن.

-تێڕوانینی گەشبینانە و تەندروستیی باش

توێژەرانی زانکۆی هارڤارد رایانگەیاندووە، دیدێکی گەشبینانە دەتوانێت تەندروستیی کەسەکان باشتر بکات و رێژەی مردن لەنێوان تەمەنی 15 بۆ 40 ساڵاندا کەمبکاتەوە.

ئەو کەسانەی لەکاتی درەنگ کەوتندا ئارامن نیشانەکانی بەرزیی پەستانی خوێن و نەخۆشییەکانی دڵیشیان کەمترە، گەشبینی دڵ و سووڕی خوێن دەپارێزێت.

-هەستی جیاوازی کات

ئەو کەسانەی کە هەمیشە لە کاتی خۆیدا دەگەن و بە نزیکەی %60 مەزەندە دەکرێن، سترێس و دڵەڕاوکێ و ماندوو دەردەکەون، لە کاتێکدا جۆری دووەم کە بەردەوام لە هەموو شوێنێک لانیکەم 30 خولەک دوادەکەون، پێدەچێت ئارامتربن و کاریگەریی دواکەوتنی درێژخایەنیان نەبێت، ئەنجامی لێکۆڵینەوەکان دەریدەخەن کە هەر کەسێک بەشێوەیەکی جیاواز هەست بە تێپەڕبوونی کات دەکات، هەر بۆیە دواکەوتن کاریگەریی لەسەر هەر تاکێک بەشێوەیەکی زۆر جیاواز هەیە.