دانیشتووانی گەڕەكێكی شاری بەعقوبە، باس لەوە دەكەن كە زەوییەكی نیشتەجێبوون لە گەڕەكەكەیاندا هۆكاری تێكچوونی گەنجانە.
چەندین وێنە و ڤیدیۆ لە تۆڕە كۆمەڵایەتییەكاندا بڵاوبوونەتەوە كە كەسانێك لەسەر ئەو پارچە زەوییە هەندێك چالاكی و جووڵەی سەیر دەنوێنن، ئەوەش ناڕەزایەتیی دانیشتووانی شارەكەی لێكەوتووەتەوە و بە لەدەستدانی هۆش و ئاوەز ناوزەدی دەكەن.
ئەو هاوڵاتییانەی لە دەوروبەری پارچە زەوییەكە نیشتەجێن، داواكارن حكومەت دەستوەردان بكات و چیتر ڕێگە بە كەس نەدات بچێتە ئەوێ و جووڵە و نمایشی سەیر و نامۆ بكات و ڤیدیۆكەی بڵاوبكاتەوە.
بەپێی میدیای ناوخۆیی پارێزگای دیالە، بەشێك لە دانیشتووانی بەعقوبە دەڵێن، ئەو زەوییە جادووگەرانەیە و هەوارگەی جنۆكەیە، بۆیە هەر كەسێك بچێتە ئەوێ ئەقڵی لەدەستدەدات و بەبێ ویستی خۆی ڕەفتاری نامۆ دەنوێنێت.
