وەزارەتی تەندروستیی هەرێم، روونکردنەوەیەکی بۆ هاوڵاتییان بڵاوکردووەتەوە بە پشتبەستن بە داتاکانی رێکخراوی تەندروستیی جیهان و دەڵێت، “سەرەڕای ئەوەی نەخۆشییەکی باوە بەڵام ئەگەر چارەسەر نەکرێت مەترسیدار دەبێ و تەنها 1 لە 5 کەس لە جیهاندا کە بەرزی پەستانی خوێنیان هەیە کۆنتڕۆڵکراوە”.
بەرزی پەستانی خوێن کاتێکە کە پەستانی خوێنبەرەکانت زۆر بەرز بێت (140/90 یان زیاتر)، دەکرێت کەسەکە هەست بە نیشانەکانی نەخۆشییەکە نەکات و تاکە رێگە بۆ ئەوەی بزانیت ئەوەیە کە زوو زوو پشکنینی پەستانی خوێن بکەیت.
ئەو شتانەی کە ئەگەری تووشبوون بە بەرزی پەستانی خوێن زیاد دەکەن بریتین لە:
-گەورەبوونی تەمەن
-بۆ ماوەیی (جینات)
-کێشی زیادە یان قەڵەوی
-نەبوونی چالاکی جەستەیی
-خواردنی خوێی زۆر
-زۆر خواردنەوەی کحول
وەزارەتی تەندروستی ئاماژەی بەوەکردووە، گۆڕانکاری لە شێوازی ژیان وەک خواردنی خۆراکی تەندروستتر و وازهێنان لە تووتن و چالاکی زیاتر دەتوانێت یارمەتی دابەزاندنی پەستانی خوێن بدات، بەڵام هەندێک کەس پێویستیان بە خواردنی دەرمان دەبێت بۆ کۆنترۆڵکردنی پەستانی خوێنیان.
روونیشیکردووەتەوە، پێویستە گرنگی بە پشکنینی پێشوەختە بدرێت و لە ئەگەری بەرزی پەستانی خوێن سەردانی پزیشکی پسپۆڕ بکرێت بۆ وەرگرتنی چارەسەر.
