بەڕێوەبەرایەتیی گشتیی کەشناسیی هەرێم پێشبینییەکانی کەشوهەوای بڵاوکردەوە و بە گوێرەی راگەیەندراوەکە ئەمڕۆ و سبەی ئەگەر بارانبارین هەیە.
کەشناسیی هەرێم بۆ ئەمڕۆ پێشبینی کردووە، ئاسمان نیمچە هەور بێت و لە هەندێک ناوچە شاخاویەکان هەوری تەواو بێت و سەبارەت بە بارانبارین ئاماژەی بەوەکردووە، لە ناوچە شاخاویەکان بە گشتی بە شێوەی لێزمە باران و هەورە تریشقە دەبێت، لە سەنتەری پارێزگای دهۆک و ئیدارەی سەربەخۆی زاخۆ لە هەندێک کاتدا بارانبارین و هەورە تریشقەی دەبێت، بەڵام سەنتەری پارێزگاکانی هەولێر و سلێمانی و کەرکوک و هەڵەبجە ئەگەری تاوەباران هەیە و لە کاتی بارانییش هەورە تریشقە دەبێت.
ئەوەش خراوەتەڕوو، ماوەی دابارین لە کاتەکانی دوایی نیوەرۆ تا کاتەکانی ئێوارە دەبێت و لە شەودا ئاسمان لە سەرجەم ناوچەکان بۆ نیمچە هەور دەگۆرێت.
لەبارەی کەشوهەوای سبەی سێشەممەوە دەڵێت، “ئاسمان نیمچە هەور دەبێت ئەگەری نمەباران لە هەندێک ناوچەی جیاواز و بری دابارین لەسەر ناوچە شاخاوییەکان زیاتر دەبێت.”
ئەوەش خراوەتەڕوو، پلەی گەرمی بەرز دەبێت بە (1-3) پلەی سیلیزی بەراورد بە تۆمارکراوی ئەمرۆ.
