قائیمقامیەتی سلێمانی بڵاویکردەوە، لە مانگی نیسانی ئەمساڵدا 143 تۆن کاڵا و شمەک و خواردەمەنی لەناوبراون کە شیاوی بەکارهێنان نەبوون و لەلایەن لیژنە هاوبەشەکانەوە دەستیان بەسەرداگیرابوو.
قائیمقامیەتی سلێمانی بڵاویکردەوە، لیژنە هاوبەشەكانی قائیمقامیەتی سلێمانی، لە مانگی نیساندا شه‌ش هه‌زار و 760 سەردانیان بۆ دووكان و بازاڕ و شوێنە گشتییەكان ئه‌نجامداوه و تیایدا پشكنینیان بۆ ئه‌و كاڵاوشمه‌ك و خوارده‌مه‌نیانه كردووه کە رۆژانه له‌لایه‌ن هاوڵاتییانه‌وه به‌كارده‌هێنرێت.
ئاماژەی بەوەشکرد، به‌هۆی پابه‌ندنه‌بوون به مه‌رج و رێنماییه‌كانی كاركردن، 486 پسووڵه‌ی سه‌رپێچییان تۆماركردووه، 192 شوێن ئاگاداركراونەتەوە سه‌رپێچی له‌مه‌رج و رێنماییه‌كانی كاركردن نه‌كه‌ن، به‌پێچه‌وانه‌وه شوێنه‌كه و خاوه‌نه‌كه‌شی رووبه‌ڕووی رێكاره یاساییه‌كان ده‌كرێنه‌وه، هاوکات به‌هۆی دوباره‌كردنه‌وه‌ی سه‌رپێچی و پابه‌ندنه‌بوون به‌مه‌رجه‌كان 18 شوێن داخراون.
هەر لە راگەیەندراوەکەی قائیمقامیەتی سلێمانیدا هاتووە، كۆی گشتی پارەی غەرامەكراو بریتییە لە 41 ملیۆن 785 هەزار دینار كه به‌پێی یاسا دەخرێتەوە سەر داهاتی گشتی.
