وەزارەتی پەروەردەی عێراق پێوەرەکانی وەرگرتنی خوێندکارانی لە خوێندنگەی ئەلیکترۆنی و کۆتا کاتی پێشکەشکردنی راگەیاند و جەختیلەوە کردەوە ژمارەی خوێندکارانی خوێندنگەکە لە زیادبووندایە.
کەریم سەید، وتەبێژی وەزارەتی پەروەردەی عێراق لە لێدوانێکیدا ئاماژەی بەوە کرد، ”ناونووسین بۆ خوێندنگە ئەلیکترۆنییەکە لە یەکی مانگی نیسانی رابردوو دەستیپێکرد و تاوەکو سەرەتای ساڵی خوێندنی داهاتوو بەردەوامدەبێت، هاوکات ژمارەی داواکاران بە شێوەیەکی بەرچاو لە زیادبووندایە”.
ئەوەشی خستەڕوو، ”پێوەرە پەسەندکراوەکانی وەرگرتنی خوێندکاران لە خوێندنگەکە تایبەتە بەو خوێندکارانەی هەموو مەرجەکانی خوێندکاری دەرەکی و تەنسیب دەیانگرێتەوە و دواتر لەو خوێندنگەیەدا قبوڵدەکرێن”.
ئەو وتەبێژەی وەزارەت ئەوەشی ئاشکراکرد، ”کرێی خوێندنی ئەلیکترۆنی تایبەتە و بۆ ساڵێکی تەواو 200 هەزار دینارە، هاوکات کەسوکاری شەهیدان و هێزە ئەمنییەکان لێخۆشبوونیان بۆ دەکرێت”.
دەشڵێت، ”ئامانج لەو پڕۆژەیە پەرەپێدانی پەروەردە و زیادکردنی ئەزموونی ئەلیکترۆنییە بۆ فێربوون و کەمکردنەوەی رێژەی وازهێنان و دروستکردنی ژینگەیەکی تەندروست بۆ ئەو خوێندکارانە”.
