كۆمپانیای دانە غاز رایدەگەیەنێت، بەرهەمهێنانى غاز لە کێڵگەى کۆرمۆر ئاسایی بووەتەوە و رۆژانە گەیشتوەتە بە 500 ملیۆن پێ سێجا.
كۆمپانیاكە لە راگەیەندراوێكدا بڵاویكردەوە، ئاستی بەرهەمهێنانی غاز لە کۆرمۆر گەیشتووەتەوە زیاتر لە 500 ملیۆن پێ سێجا لە رۆژێکدا، بەرهەمهێنانی LPG گەیشتووەتەوە 1100 تۆن و گازی کۆندێنسەیتیش 15 هەزار بەرمیل”.
دەشڵێت، “دەستپێکردنەوەی بەرهەمهێنان دوای گرتنەبەری رێوشوێنی پێویست دێت لەلایەن هەردوو حکومەتی عێراق و هەرێمی کوردستانەوە”.
دانە غاز ئاماژەشدەدات، خۆشحاڵن بە پاڵپشتیکردنی بەرهەمهێنانی کارەبا لە رێگەی دابینکردنی گاز بۆ وێستگەکانی بەرهەمهێنانی کارەبا بە نرخێکی هەرزان و کاربۆنی کەم، هەروەها دابینکردنی بڕی پێویستیی LPG لە هەرێمی کوردستان.
ئێوارەی هەینی 26ی نیسان لەڕێی درۆنەوە هێرشێك بۆسەر كێڵگەی كۆرمۆر ئەنجامدرا، بەهۆیەوە چوار کارمەندى کۆمپانیاکە گیانیان لەدەستدا و ژمارەیەکی دیکەش برینداربوون، جگە لە زیانە ماددییەكان.
بەهۆی هێرشەكەوە كۆمپانیای دانە غاز كە سەرپەرشتیی كێڵگەكە دەكات، كارەكانی بەرهەمهێنانی راگرت، بەر لەوەی رۆژی چوارشەممە 1ی ئایار دووبارە دەست بە بەرهەمهێنان بكاتەوە.
