حەیان عەبدولغەنی، وەزیری نەوتی عێڕاق رایگەیاند، تا ئێستا رێککەوتن نەکراوە بۆ رادەستکردنی بەرهەمی نەوتی هەرێم بە وەزارەتی نەوتی عێراق.
باسی لەوەشکرد، لە نێوان حکومەتی عێراق و حکومەتی هەریم ناکۆکی هەیە کە رێگرە لە هەناردەکردنەوەی نەوتی هەرێم و ئەوەش پەیوەندیدارە بە گرێبەستی حکومەتی هەرێم و کۆمپانیا نەوتییەکان و لە هەوڵی چارەسەرکردنیداین.
وەزیری نەوتی عێراق لە لێدوانێکدا ئاماژەی بەوەشکرد، پێویستە پێداچوونەوە بە گرێبەستە نەوتییەکانی هەرێم بکرێت لەگەڵ کۆمپانیا نەوتییەکان، بەهۆی ئەوەی جیاوازی هەیە بەراورد بە گرێبەستەکانی عێراق لەگەڵ کۆمپانیا نەوتییەکان.
روونیشیکردەوە، دوو لیژنە بۆ چارەسەرکردنی بابەتەکە پێکهێندراوە و لەماوەی هەفتەی داهاتوودا کۆبوونەوە لەگەڵ لیژنەکان دەکرێت و نوێنەری حکومەتی هەرێمیش تێیدا بەشدار دەبێت.
