ئاگر لە دوكانێكی بازاڕی تایەفرۆشانی كەركوك كەوتەوە و تیمەكانی بەرگریی شارستانی لە شوێنی رووداوەكەن و هەوڵی كۆنتڕۆڵكردنی دەدەن.
پەیامنێرمان لە كەركوك پێیڕاگەیاندین، ئاگرەكە لە دوكانێكی بازاڕەكە كەوتووەتەوە و تیمەكانی بەرگریی شارستانی لە هەوڵی كۆنتڕۆڵكردنیدان.
وتیشی، “بەهۆی ئاگرەكەوە چەند كەسێك برینداربوون و رەوانەی نەخۆشخانە كراون”.
بازاڕی تایەفرۆشان دەكەوێتە گەڕەكی غەرناتە لەسەر رێگای كەركوك- بەغداد.
پەیامنێرمان لە زاری بەشێك لە فرۆشیارانی بازاڕەكەوە وتی، ئاگرەكە كاتژمێر 8ی بەیانیی ئەمڕۆ بەهۆی شۆرتی كارەباوە دروست بووە.
ئەوەشی خستەڕوو، تەنها دوكانێك سووتاوە، بەڵام لە بەشی پشتەوەی كاریگەری ئاگرەكە و دووكەڵ بۆ چەند دوكانێكی دیكە گوازراوەتەوە.
