وەزارەتی تەندروستیی عێراق رایدەگەیەنێت، بەردەوامە لە هەڵمەتەکانی کوتان دژی نەخۆشیی سورێژە و بڕیاردراوە ماوەی هەڵمەتەکە درێژ بکرێتەوە.
د.کەمال عەبدولڕەزاق کازم، یاریدەدەری بەڕێوەبەری بەشی کوتان لە وەزارەتی تەندروستیی عێراق لە چاوپێکەوتنێکدا لەگەڵ رۆژنامەی سەباح رایگەیاند، ”هەڵمەتی کوتان دژی نەخۆشیی سورێژە بۆ ماوەی دوو رۆژی دیکە درێژکرایەوە دوای ئەوەی لە 24ی ئەم مانگەدا کۆتاییهات”.
ئاماژەی بەوەش کردووە، ”هەڵمەتەکە لە رۆژانی یەکشەممە و دووشەممەی ئەم هەفتەیە بەردەوام دەبێت، هاوکات لەو 10 رۆژەدا 6 ملیۆن و 206 هەزار و 829 منداڵ بە رێژەی 83.9% کوتانیان بۆ کراوە لە سەرتاسەری عێراق بە کوردستانیشەوە بە مەبەستی پاراستنی خەڵکی وڵاتەکەمان و پاراستنی تەندروستییان لە تووشبوون بەو نەخۆشییە”.
ئەو بەرپرسەی وەزارەتی تەندروستی جەختیلەوە کردەوە، ”لەناو بنکە تەندروستییەکاندا لە هەموو پارێزگاکان، تیمان هەیە بۆ کوتانی ئەو خوێندکارانەی کە ئامادەنەبوون یان مۆڵەتیان هەبووە یاخود دەرفەتی کوتانیان نەبووە لە خوێندنگەکانیاندا”.
