بڕیارە لە شاری میلانی ئیتاڵیا خواردنی ئایسکرێم و پیتزا لە درەنگانی شەودا قەدەغە بکرێت بەهۆی نیگەرانییەکانی هاوڵاتییانی چەند ناوچەیەک لە بوونی ژاوەژاو و پاشماوەی خۆڵ و خاشاکی گەشتیاران.
مارکۆ گرانێلی، جێگری سەرۆکی شارەوانیی میلان دەڵێت، ”ئامانج لە قەدەغەکردنەکە بەدیهێنانی هاوسەنگییە لە نێوان پەیوەندیی کۆمەڵایەتی و کات بەسەربردن و ئاشتی و ئارامی بۆ دانیشتووانی شارەکە”.
بەپێی پێشنیازە نوێیەکە، قەدەغەکردنەکە کاریگەری لەسەر شوێنەکانی نانخواردن لە ناوچەکانی وەک نۆلۆ، لازاریتۆ، مێلزۆ، ئیسۆلا و چەند ناوچەیەکی دیکە دەبێت.
لە رۆژانەکانی هەفتەدا لە کاتژمێر 12:30ی شەو و لە کۆتایی هەفتەدا لە کاتژمێر 1:30ی شەو قەدەغەکردنەکە دەستپێدەکات و لە مانگی ئایارەوە تاوەکو مانگی نۆڤەمبەر بەردەوامدەبێت، هاوکات دانیشتووان و بازرگانەکان تاوەکو سەرەتای مانگی ئایار مۆڵەتیان هەیە نیگەرانییەکانیان دەرببڕن و پێشنیازی هەموارکردنەوە لە یاسا نوێیەکەدا بکەن.
