دەستەی باڵای حەج و عومرەی عێراق بڵاویکردەوە، خاوەنی چەند کۆمپانیایەک دەستگیرکران کە کاری بەلاڕێدابردنی هاوڵاتییانیان کردووە و بانگەشەی حەجی بازرگانییان کردووە.
حەسەن فەهد، وتەبێژی دەستەکە رایگەیاند، هەندێک لە خاوەن کۆمپانیاکانی عومرە و حەج فێڵیان لە هاوڵاتییان کردووە و بانگەشەی ئەوە دەکەن کە ڤیزەیان هەیە و هاوڵاتییان دەتوانن رێوڕەسمی حەج ئەنجام بدەن لە رێگەیانەوە بەشێوەی حەجی بازرگانی هەر بۆیە لەسەر ئەو کارە رێکاری یاساییان لەبەرامبەر گیرایەبەر و دەستگیرکران.
هۆشداریشی بە هەر کەسێک داوە کە ئەو کارە دەکات، هەماهەنگی لە نێوان دەستەکەیان و وەزارەتی ناوخۆی عێراق و وەزارەتی حەج و عومرەی سعودیە هەیە لەسەر بابەتەکە.
داوای لە هەموو هاوڵاتییان کرد، نەکەونە ژێر کاریگەری ئەو کەسانەی کاری لەو جۆرە دەکەن و بانگەشەی حەجێکی لەو جۆرە دەکەن.
