نرخی زێڕ لە بەرزبوونەوە بەردەوامە و ئەمڕۆ نرخی ئۆنسەیەک دوو هەزار و 419 دۆلارە.
ئەمڕۆ لە بازاڕەکانی جیهاندا نرخی زێڕ بەرزبوونەوەی دیکەی تۆمار کرد بەجۆرێک هەر ئۆنسەیەک بە دوو هەزار و 419 دۆلار مامەڵەی پێوەدەکرێت.
دوێنێ هەینی، لە کاتی داخستنی بازاڕەکان یەک ئۆنسە زێڕ بە دوو هەزار و 392 دۆلار مامەڵەی پێوەکرا.
لەمساڵدا بەهای زێڕ چەندین جار بەرزبووەتەوە بەجۆرێک بەرزبوونەوەکان مێژوویی بوون.
لەبارەی هۆکارەکانی بەرزبوونەوەی زێڕ، ئەدیب غەریب لە زەڕەنگەری لالە لە سلێمانی بە تۆڕی میدیایی ئێستای راگەیاند، گرژییەکانی رۆژهەڵاتی ناوەڕاست یەکێکە لە هۆکارەکانی بەرزبوونەوەی نرخی زێڕ، و یەکێکی دیکە لە هۆکارەکان ئەوەیە کە ئەمریکا دۆلارێکی زۆری چاپکردووە و کاریگەری لەسەر نرخی زێڕ هەیە.
وتیشی، لە ماوەی رابردوودا چین و هیندستان نزیکەی 20 تۆن ئاڵتونیان کڕی، ئەوەش کاریگەری لەسەر نرخی زێڕ هەبوو، پێشبینی بەرزبوونەوەی زیاتری نرخی زێڕ دەکرێت.
