بەڕێوەبەری گشتیی بودجە لە وەزارەتی دارایی هەرێمی کوردستان رایگەیاند، لە ئێستادا وەزارەتەکان سەرقاڵی ئامادەکردنی لیستی پلە بەرزکردنەوەی فەرمانبەرانن و دەبێت تا رۆژی 1ی ئایار سەرجەم وەزارەتەکان لیستی پلەبەرزکردنەوە بنێرن بۆ وەزارەتی دارایی و ئەوانیش ئامادەباشیان نیشانداوە.
ئارام عەبدوڵا، بەڕێوەبەری گشتیی بودجە لە وەزارەتی دارایی هەرێمی کوردستان لە لێدوانێکدا ئاماژەی بەوەکرد، بەشێک لە وەزارەتەکان لیستی پلە بەرزکردنەوەی خۆیان ناردووەتەوە بۆ وەزارەتی دارایی و ئەوانەی دیکەش سەرقاڵی ئامادەکردنی لیستەکەن.
باسی لەوەشکرد، دوای گەیشتنی لیستی پلە بەرزکردنەوەی سەرجەم وەزارەتەکان، وەزارەتی دارایی پێداچوونەوەیان پێدا دەکات و دواتریش کە قەبارەی ئەو پارەیە زاندرا کە پێویستە بۆ پلە بەرزکردنەوە دەمانەوێت، ئەو بڕە پارەیەش بگێڕینەوە بۆ فەرمانبەران کە غەدریان لێکراوە و لە 2016وە پلە بەرزکردنەوە وەستاوە.
دەشڵێت، “بە گوێرەی بڕیارەکەی دادگای فیدڕاڵی دەبێت مووچەی هەموو مووچەخۆرانی هەرێم هاوتای مووچەی مووچەخۆرانی عێراق بکرێت.”
