دادگای سلێمانی بڕیاریدا بکوژی خواناس وریا بە زیندانی هەتاهەتایی سزابدات.
ئەمڕۆ سێشەممە دادگای سلێمانی دانیشتنێکی دیکەی دادگاییکردنی تاوانباری کوشتنی خواناس وریای بەڕێوەبرد و لە کۆتایی دانیشتنەکەدا بە پشتبەستن بە وتەی شاهیدەکان و دانپێدانانی تاوانبارەکە بڕیاریدا بە زیندانی هەتاهەتایی سزای بکوژەکە بدات.
خواناس وریا گەنجێکی شانۆکاری دانیشتووی قەزای چەمچەماڵ بوو، لە 22ی حوزەیرانی 2023 لە ناو بازاڕی قەزاکە ماتۆڕسوارێک دەستڕێژی گوللەی لێکرد و بەو هۆیەوە گیانیلەدەستدا.
لەدوای رۆژێک لە تاوانەکە هێزەکانی ئاسایشی رۆژئاوای سلێمانی دەستگیرکردنی تۆمەتباری رووداوەکەیان راگەیاند.
تۆمەتباری رووداوەکە تەمەنی 28 ساڵان بووە و لەبەردەم دادوەر دانی بەوەداناوە کە لەگەڵ تاوانلێکراوەکە یەکیان ناسیوە و بە هۆکاری جیاوازی بیروباوەڕەوە تاوانەکەی ئەنجامداوە.
