پەرلەمانتارێك دەڵێت، “وەزارەتەكانی بازرگانی و پیشەسازی و ئەوقاف و هەردوو وەقفی سونی و شیعی پارەیەكی زۆر بەهەدەر دەدەن و هیچ سوودێكیان بۆ هاوڵاتییان نییە.”
نەدا شاكر جەودەت، ئەندامی لیژنەی ئابوری و وەبەرهێنانی پەرلەمانی عێراق لە لێدوانێكدا بۆ “تۆڕی میدیایی ئێستا” ڕایگەیاند، “ئەو سێ وەزارەتە زیادە و ناپێویستن، چونكە سوودیان بۆ هاوڵاتییان نییە و لێیانەوە دوورن.”
وتیشی، “لە چەندین كات و بۆنەدا داوام لە مستەفا كازمی سەرۆكوەزیران كردووە، وەزارەتەكانی بازرگانی و پیشەسازی و ئەوقاف و كاروباری ئایینی هەڵبوەشێنێتەوە، لەبەر ئەوەی لەم هەلومەرج و بارودۆخەی ئێستادا هیچ سوود و كەڵكێكیان نییە.”
نەدا شاكر جەودەت كە ئەندامی فراكسیۆنی دەوڵەتی یاسا بە سەرۆكایەتیی نوری مالكی-یە، باس لەوە دەكات كە “ئەو وەزارەتانە و هەردوو وەقفی سونی و شیعی و چەندین دمەزراوەی تر، بارێكی قورسن بەسەر بودجەی عێراقەوە، لەكاتێكدا بێبەرهەمن و دەستكەوتیان بۆ حكومەت و خەڵك نییە و هیچ كارێكی ئەوتۆیان نەكردووە كە ژیانی هاوڵاتییان بگۆڕێت.”
لە درێژەی لێدوانەكەیدا بۆ “ئێستا” نەدا شاكر جەودەت، ئەندامی لیژنەی ئابوری و وەبەرهێنانی لە پەرلەمانی عێراق ڕایگەیاند، “بێكاری بە ڕێژەیەكی بەرز بەربڵاوە، خەڵكی هەژار و نەدارن و پێویستییان بە بژێوی و نانە، كەچی چەندین وەزارەت و دامەزراوە و دەستە لە وڵاتدا هەن كە جگە لە خەرجییەكی زۆر و بەهەدەردانی پارەی دەوڵەت، بوون بە ئیمپراتۆرییەت بۆ خۆیان و سوپایەك موچەخۆریان هەن، بەبێ ئەوەی سوود بە هاوڵاتییان بگەیەنن.”
