بافڵ جەلال تاڵەبانی و سەید عەمار حەکیم، جەخت لە پێشکەشکردنی خزمەتگوزاریی زیاتر بە خەڵک و پشتگیریکردن لە بەرنامەی چاکسازی لە وڵاتدا دەكەنەوە.
بافڵ جەلال تاڵەبانی، سەرۆکی یەکێتیی نیشتمانیی کوردستان بە یاوەریی رەفعەت عەبدوڵڵا، بڕیاردەری دەستەی کارگێڕی و خالید شوانی، ئەندامی مەکتەبی سیاسی لە بەغداد سەردانی سەید عەمار حەکیم، سەرۆکی رەوتی حیکمەی کرد.
لە سەردانەکەدا سەرۆک بافڵ جەلال تاڵەبانی پرسە و هاوخەمیی یەکێتیی نیشتمانیی کوردستانی بۆ کۆچی دوایی سەید سادق ئەلحەکیم، کوڕی ئایەتوڵلای عوزما محەمەد باقر ئەلحەکیم گەیاندە سەید عەمار حەکیم و بنەماڵە تێکۆشەرەکەی و رایگەیاند، دۆستایەتیی لەمێژینەی سەرۆک مام جەلال و بنەماڵەی ئەلحەکیم، بناغەیەکی قووڵ و لەمێژینەی هەیە و ئێمەش درێژەپێدەری دەبین. وتیشی، پشتیوانی و رۆڵی جوامێرانەی ئێوە لە قۆناغە جیاوازەکانی خەباتی گەلی کورددا لەیادناکەین و بە چاوی رێزەوە لێیدەڕوانین.
هەر لە دیدارەکەدا گفتوگۆی هەمەلایەنە لەبارەی کێشەکانی هەرێم و عیراق کرا و جەخت لە چارەسەرکردنیان و بەردەوامیی دیالۆگ و لێکتێگەیشتن لەنێوان هەردوولا کرایەوە، لەپێناو هێنانەدیی ئامانجە باڵاکان و پێشکەشکردنی خزمەتگوزاریی زیاتر بە خەڵک و پشتگیریکردن لە بەرنامەی چاکسازی لە وڵاتدا.
