وەزیری دەرەوەی ئەمریکا سەبارەت بە هەڵبژاردنی پەرلەمانی کوردستان ئاماژەی بەوە کرد، دەیانەوێت هەڵبژاردن ئەنجامبدرێت و ئەنجامدانی ئەو پڕۆسەیەش بەشێکی گرنگە لە بەرەو پێشچوون پەیوەندییەکانی نێوان بەغداد و هەولێر.
ئەنتۆنی بلینکن، وەزیری دەرەوەی ئەمریکا لە کۆنگرەیەکی رۆژنامەوانیدا رایگەیاند، ”ئێمە دەمانەوێت ئەنجامدانی هەڵبژاردن و بەرەو پێشچوونی ئەو پڕۆسەیە ببینین، هەروەها دەمانەوێت دڵنیابین لەوەی خەڵک هەست بکەن کە نوێنەرایەتییەکی باشیان هەیە”.
دەشڵێت، ”ئێمە زۆر سەرنجمان لەسەر دروستکردنی پەیوەندییەکی ئەرێنی بوو لە گفتوگۆکانمان لەگەڵ حکومەتی عێراق و بەرپرسانی حکومەتی هەرێم و هەڵبژاردنیش بەشێکی گرنگی ئەو پرسەیە”.
سەبارەت بە پەیوەندییەکانی نێوان هەرێم و بەغداد، ئەوەی خستەڕوو، ”ئەوە زۆر گرنگە کە ئەو پەیوەندییانە بە شێوەیەکی ئەرێنی و بەرهەمدار بەرەو پێشەوەبچن لە بەرژەوەندی هەموو خەڵکی عێراق بە هەرێمی کوردستانیشەوە”.
