گرژییەکانی نێوان سەرۆکی پارتی سۆسیال دیموكرات و برا و جێگری سەرۆکی پارتەکە بەردەوامی هەیە، عەبدوڵای حاجی مەحمود دەڵێت، سبەی بەشداریی کۆنگرەی پارتەکەم دەکەم و مافی خۆمە.
بەیانیی ئەمڕۆ جارێکی دیکە گرژی و ئاڵۆزی لەنێوان محەمەدی حاجی مەحمود سەرۆکی پارتی سۆسیال دیموکراتی کوردستان و عەبدوڵای حاجی مەحمودی برای کە جێگری سەرۆکی پارتەکەیە دروستبوو، ئەوەش دوای ئەوەی کوڕی عەبدوڵای حاجی مەحمود گەڕاوەتەوە بۆ گوندی گوڵەخانە بە مەبەستی چوونی بۆ ناو ماڵەکەی، بەڵام وەک خۆیان دەڵێن، “لەلایەن پێشمەرگەکانی باڵی محەمەدی حاجی مەحمودەوە تەقەیان لێکراوە و رێگرییان لێکراوە و، لە ئێستاشدا کوڕەکەی لە ماڵەکەی خۆیدا تەوقدراوە”.
دوێنێ سێشەممە، فەرهاد تۆفیق، وتەبێژی پارتی سۆسیال دیموکراتی کوردستان رایگەیاند، دوای تەواوبوونی ئامادەکارییەکان، رۆژی پێنجشەممە 4ی نیسان حزبەكەیان کۆنگرەی هەشتەمی خۆی لە پارێزگای هەڵەبجە دەبەستێت، لەو بارەیەوە عەبدوڵای حاجی مەحمود رایگەیاند، بەشداری کۆنگرە دەكات، ئەوەش سەرەڕای دوورخستنەوەی لە لەلایەن سەرۆکی پارتەکەوە کە محەمەدی حاجی مەحمودی برایەتی.
عەبدوڵای حاجی مەحمود هۆشداریشیدا، لەوەی بەرپرسیارییەتی ئەنجامی کۆنگرەکە هەڵناگرن ئەگەر تێکبچێت یاخود نوێنەری کۆمسیۆن شوێنەکە بەجێبهێڵێت، چونکە لە ژێر زەبری هێزی سەربازییدا کۆنگرە ئەنجام نادرێت.
