ئامادەكارییەكان بۆ هەڵبژاردنی پەرلەمانی كوردستان بەردەوامە و وتەبێژی كۆمسیۆن دەڵێت، لیژنەی تایبەت بە هەڵبژاردنی كارمەندانی رۆژی دەنگدان پێكهێنراوە.
جومانە غەلای، وتەبێژی كۆمسیۆنی باڵای سەربەخۆی هەڵبژاردنەكان بە تۆڕی میدیایی ئێستای راگەیاند، ئەنجومەنی كۆمسیاران رێوشوێن و شێوازی هەڵبژاردنی كارمەندانی رۆژی دەنگدانی هەڵبژاردنی پەرلەمانی كوردستانی پەسەندكردووە.
ئەوەشی وت، لیژنەیەكی ناوەندی بۆ هەڵبژاردنی كارمەندانی رۆژی دەنگدان بە سەرۆكایەتیی دادوەر (فەیاز یاسین حسێن) و ئەندامێتی ئەندامانی فەرمانگە و بەشە جیاوازەكانی كۆمسیۆن پێكهێنراوە.
غەلای مەرج و وردەكارییەكانی كارمەندانی دەنگدانی ئاشكراكرد و باسی لەوەكرد، كارمەندانی فەرمانگەكانی حكومەت، بەمەرجێك كەمترین بڕوانامەی ئامادەیی بێت، خوێندكارانی زانكۆ و پەیمانگاكان، بەمەرجێك تەمەنی لە 19 ساڵ كەمتر نەبێت و دەرچووان بەمەرجێك كەمترین بڕوانامەی دبلۆم بێت دەتوانن داواكاری پێشكەش بكەن.
هەروەك مەرجەكانی دیكەشی خستەڕوو و وتی، مەرجە تەمەنیان لەنێوان (1969 بۆ 2005) بێت، خاوەن كارتی دەنگدانی بایۆمەتری بێت، دانیشتووی پارێزگا و سنووری ناوچەی دەنگدان بێت، كەسی نزیك و پلەیەكی كاندیدان نەبێت، ئەندام نەبێت لە هێزە ئەمنییەكان، پەیماننامەیەك پڕبكاتەوە كە داواكراو و تێوەگلاوی تاوان نەبێت، بریكاری لایەنەكان و رێكخراوەكان نەبێت و سەربەخۆ بێت.
وتەبێژی كۆمسیۆن روونیشیكردەوە، تۆماركردن بەشێوەی ئەلیكترۆنی لەڕێگەی بەستەرێكەوە دەبێت كە لە سایتی رەسمیی كۆمسیۆن بڵاویدەكەنەوە.
