ئەمڕۆ پزیشکانی نیشتەجێی دێرین و خولاو لە سنووری سلێمانی بڕیاریاندا لەسەرجەم نەخۆشخانە و بنکە تەندروستییەکان بەهۆی دەستبەسەرداگرتنی مووچەکانیان بایکۆتی دەوام بکەن.
نوێنەری پزیشکان لە کۆنگرەیەکی رۆژنامەوانیدا رایگەیاند، ئێمە وەک پزیشکانی گەنج لە (نیشتەجێی خولاو، نیشتەجێی دێرین و پلەبەند) لە ماوەی رابردوودا بە هەستکردنمان بە بەرپرسیارێتی بەردەوام بووین، بەڵام لە ئێستادا لە بارودۆخێکی سەختی داراییداین، بۆیە دوای ئەوەی کە هیچ چارەسەرێکمان نەما بڕیارماندا بە بایکۆتکردنی دەوام لەسەرجەم نەخۆشخانە و بنکە تەندروستییەکانی ناو شاری سلێمانی و دەرەوەی شار.
ئاشکراشیکرد، دەوام لە بەشی فریاکەوتنی نەخۆشخانەکان و ئەنجامدانی نەشتەرگەری کتوپڕ بەردەوام دەبێت.
جەختیشیکردەوە، ئێمە پێمان وایە شایستە داراییەکانمان هاتووە و لایەنێک دەستیبەسەردا گرتووە.
