لە هەولێر هێزە ئەمنییەكان رێگری لە مامۆستایەك دەكەن كە دەیویست كۆنگرەی رۆژنامەنووسی بۆ راگەیاندنی كەمپینی داواكردنی مووچە ئەنجامبدات.
مامۆستا شوان رەحمان قەشقە، دوێنێ كەمپینێكی بە ناوی #دەسەڵات_کوا_مووچەکەم راگەیاند و داوای لە مامۆستا و فەرمانبەران بەشداری تیادابكەن و بە دەسەڵات بڵێن كوا مووچەكەم؟
ئەو مامۆستایە بەنیازبوو پاش نیوەڕۆی ئەمڕۆ لە كۆنگرەیەكی رۆژنامەنووسیدا داواكارییەكانی خۆی و مووچەخۆران و وردەكاریی كەمپینەكەی بخاتەڕوو، بەڵام پەیامنێرمان لە هەولێر پێی راگەیاندین، هێزە ئەمنییەكان رێگری لێدەكەن.
پەیامنێرمان ئەوەشی وت، مامۆستا شوان گوێی بە رێگرییەكان نەدا، بەڵام ناچاربوو لە كاتێكی دواتر و لە شوێنێكی دیكە كۆنگرە رۆژنامەنووسییەكەی ئەنجامبدات.
