لقی سلێمانیی سەندیکای کارمەندانی تەندروستی رایدەگەیەنێت، لە ئەمڕۆوە بایکۆتی دەوام دەکەن لە سەرجەم ناوەند و بنکە و نەخۆشخانە و سەنتەر و مەڵبەندە تەندروستییەكان جگە لە فریاکەوتن و شوێنە هەستیارەکان.
هاوژین عوسمان، بەرپرسی لقی سلێمانیی سەندیکای کارمەندانی تەندروستیی کوردستان لە کۆنفڕانسێکی رۆژنامەوانیدا رایگەیاند، بەهۆی دابەشنەکردنی مووچەکانیان و خراپی دۆخی دارایی کارمەندانەوە، بڕیاری بایکۆتی دەوامیان داوە.
ئاماژەی بەوەکرد، دوای لێدوانی وەزیری دارایی هەرێم و قسەکانی کە هیچ وادەیەکی بۆ دابەشکردنی مووچە رانەگەیاند و هیچ تروسکاییەک بۆ دابەشکردنی مووچەکانیان نییە، وایكرد بڕیاری بایکۆت بدەن.
هاوژین عوسمان باسی لەوەشکرد، بە ناچاری بڕیارەکەیان داوە و داواکارییان لە ئێستادا داوایەكی سەرەتاییە کە مووچەکانیانە و وتی، “ئومێدمان وایە بەو پارەیەی لە بەغدادەوە هاتووە، لەگەڵ داهاتی ناوخۆ لە دوای کۆبوونەوەی رۆژی چوارشەممەی ئەنجومەنی وەزیران دەست بە دابەشکردنی مووچە بکرێت”.
