بایكۆتكردنی دەوامی فەرمانگەكان درێژەی هەیە و ئەمڕۆ ژمارەیەك لە خوێندنگەكانیشی گرتەوە.
بەهۆی دەستبەسەرداگرتن و دابەشنەكردنی مووچەكانیان لە دوێنێوە بایكۆتی دەوام لە ژمارەیەك لە فەرمانگەكانی سلێمانی، هەڵەبجە، گەرمیان و راپەڕین دەستیپێكردەوە و ئەمڕۆش بەشێك لە خوێندنگەكانی گرتەوە.
دوێنی بایكۆتی دەوام لە فەرمانگەكانی (هاتوچۆی سلێمانی، تاقیگەی بیناسازیی سلێمانی، خانوبەرەی میریی سلێمانی، زانكۆی سلێمانی، بەڕێوەبەرایەتیی گشتیی کارەبا، دابەشکردنی کارەبای رۆژئاوای سلێمانی و چەند فەرمانگەیەكی دیكە) راگەیەندرا.
سەرەڕای نزیكبوونەوەی مانگی ئازار لە كۆتاییەكەی، بەڵام هێشتا مووچەی مانگی شوباتی فەرمانبەرانی هەرێم دابەشنەکراوە و مووچەی سێ مانگی کۆتایی ساڵی رابردووش دابەشنەکراوە و چارەنووسیان نادیارە.
