ئەندامێكی لیژنەی دارایی لە ئەنجومەنی نوێنەرانی عێراق ڕایدەگەیەنێت، ئەمیندارێتیی ئەنجومەنی وەزیرانی عێراق ڕەزامەندی لەسەر خەرجكردنی شایستەی دارایی جوتیارانی هەرێمی كوردستان تایبەت بە ساڵانی ڕابردوو دەربڕی.
د. نەرمین مەعروف ئەندامی لیژنەی دارایی لە ئەنجومەنی نوێنەرانی عێراق لە لێدوانێكدا بە تۆڕی میدیایی ئێستای ڕاگەیاند، ئەمڕۆ چوارشەممە، سەردانی ئەمیندارێتیی ئەنجومەنی وەزیرانی عێراقم كرد و لەگەڵ حەمید غەزی ئەمینداری ئەنجومەنی وەزیرانی عێراق كۆبوومەوە.
ئاشكرایكرد، ئامانجی سەردانەكە بە دواداچوون بووە بۆ ڕەزامەندیی سەرۆكایەتیی ئەنجومەنی وەزیرانی عێراق وەكو كۆتا ڕێكاری كارگێڕیی تایبەت بە خەرجكردنی شایستەی گەنمی جوتیارانی هەرێم بۆ ساڵەكانی 2014- 2015- 2016 بەپێی بڕگەی یەك خشتەی(ئەلف) هاوپێچ بە یاسای ئاسایشی خۆراك بۆ ئەوەی هیچ ڕێگرییەك بۆ ناردنی شایستە داراییەكان نەمێنێت.
ئاماژەی بۆ ئەوەش كرد، ئەمڕۆ ئەمیندارێتیی ئەنجومەنی وەزیران ڕەزامەندی لە سەر داواكەم دەربڕی كە ماوەی یەك مانگە لە بەدواداچوونی بەردەوامدام و هەموو هەوڵێكم دا شایستەی دارایی جوتیاران نەفەوتێت و خەرجبكرێت”.
