بڕیارى یەک ساڵ لێخۆشبوون لە کرێى ساڵانە و 6 مانگ رسوماتی خاشاکى دووکاندارانی بازاڕی لەنگەی شاری هەولێر پەسەندکرا، ئەوەش دوای ناڕەزایی دەربڕین و چەندین جار گردبوونەوەی خاوەن دوکانەکان لە بەرامبەر قەرەبوونەکردنەوەیان.
پارێزگای هەولێر لە راگەیەندراوێکدا بڵاویکردەوە، لە دانیشتنى ژمارە 10ى ئەنجومەنى شارەوانیى هەولێر لە 6ی ئازاری 2024 سەبارەت بە هاریکارى و یارمەتیدانى زیانلێکەوتووانى بازاڕی لەنگەی شاری هەولێر، بڕیاردرا بەڵێخۆشبوونى یەک ساڵ لە کرێى ساڵانە و 6 مانگ لێخۆشبوون لە رسوماتى خۆڵ و خاشاکى هەموو ئەو دوکانانەى کە گرێبەتستیان لەگەڵ سەرۆکایەتیى شارەوانیى هەولێر هەیە و بەهۆى رووداوى ئاگرکەوتنەوەکە زیانیان بەرکەوتووە.
لە راگەیەندراوەکەی پارێزگای هەولێردا هاتووە، ئەمڕۆ یەکشەممە 24ی ئازاری 2024 ئومێد خۆشناو، پارێزگارى هەولێر، بڕیارەکەى پەسەند کرد و لەمڕۆوە بڕیارەکە لەلایەن بەشى ژمێریارى و داهات و گرێبەستەکان دەچێتە بوارى جێبەجێکردنەوە.
ئێوارەی رۆژی 27ی شوباتی 2024ئاگرێکی گەورە لە بازاڕی لەنگەی شاری هەولێر کەوتەوە و بەهۆیەوە 166 دووکانی بازاڕەکە زیانیان پێگەیشت، خاوەن دوکانەکان چەندین جار لەبەرامبەر قەرەبوونەکردنەوەیان ناڕەزاییان دەربڕی و گردبوونەوەیان ئەنجامدا.
