نوسینگەی سلێمانی کۆمسیۆنی باڵای سەربەخۆی هەڵبژاردنەکانی عێراق ئاماری وەرگرتنەوەی کارتی بایۆمەتری دەنگدانی لەلایەن هاوڵاتییانەوە بڵاوکردووەتەوە و دەڵێت، لە یەک هەفتەدا لە سلێمانی 21477 کارت وەرگیراوەتەوە.
بە گوێرەی راگەیەندراوەکەی نوسینگەی کۆمسیۆنی باڵای سەربەخۆی هەڵبژاردنەکانی عێراق، زۆرترین بڕی وەرگرتنەوەی کارتی بایۆمەتری لە سلێمانی بووە و لە کۆی هەموو پارێزگاکانی عێراق لە هەفتەیەدا 46 هەزار و 425 کارت وەرگیراوەتەوە.
لە راگەیەندراوەکەدا ئاماژە بەوەشکراوە، ئۆفیسی سلێمانی کۆمسیۆن لە رێگەی (79) ناوەندی تۆماری سەر بە ئۆفیسەکە، کە لە ھەموو شارو شارۆچکەکانی پارێزگای سلێمانی بوونیان ھەیە رۆژانە لە کاتژمێر(8:00)ی بەیانی تا کاتژمێر (2:00)ی پاشنیوەرۆ کراوەیە بەرووی ھاوڵاتیاندا.
باس لەوەشکراوە، لە ئێستادا سەرجەم ئەو ھاوڵاتیانەی کە لە نێوان (2022⁄3⁄20) تا (2023⁄9⁄20) خۆیان تۆمارکردووە، دەتوانن سەردانی ناوەندەکانی سنوری نیشتەجێبوونیان بکەن بەمەبەستی وەرگرتنەوەی کارتی دەنگدانەکانیان.
