عەبدوڵای حاجی مەحمود جێگری دوورخراوەی پارتی سۆسیال دیموکراتی کوردستان رایگەیاند، بڕیاری دوورخستنەوەی دژی پەیڕەوی ناوخۆی حزبەکەیە و لە دەسەڵاتی ئەنجومەنی سەرکردایەتییدا نییە.
عەبدوڵا حاجی مەحمود لە کۆنگرەیەکی رۆژنامەوانیدا رایگەیاند، دیارە ئەمڕۆ کۆبوونەوەیەک لە دەڤەری شارەزوور کراوە بڕیاری دوورخستنەوەمان دراوە، ئێمە لە کۆنگرەی سۆسیال دیموکرات سەرۆک و جێگرەکەی بە کۆی دەنگی ئەندامانی کۆنگرە هەڵبژێردراون، بۆیە لابردنیان لە دەسەڵاتی ئەنجومەنی سەرکردایەتیی نییە و تەنها لە دەسەڵاتی کۆنگرەدایە.
ئاماژەی بەوەشکرد، ئەو کۆبوونەوەیەی کراوە کۆبوونەوەی بەرفراوانە بۆیە لە کۆبوونەوەیەکی وادا ناتوانرێت بڕیارێکی لەو شێوەیە بدرێت،
ئێمە وەک پارتی سۆسیال دیموکراتی کوردستان نیازمانە بۆ هەڵبژاردنی داهاتووی پەرلەمانی کوردستان بەشداریی بکەین، بەداخەوە دەبوو لەم کاتەدا سەرقاڵی کۆکردنەوەی دەنگ و یەکخستنی دەنگ بین نەک بەم شێوەیە ئەم جۆرە بڕیارانە بدرێت.
