وەزیری گەنجینەی ئەمەریکا رایگەیاند، وەزارەتەکەی پێشبینی دەکات لە ساڵی 2024دا نرخی شمەک لە 80%ی وڵاتانی جیهان داببەزن.
جانێت یلین وەزیری گەنجینەی ئەمریکا، لە سەروبەندی کۆبوونەوەی وەزیرانی دارایی و بەڕێوەبەرانی بانکی ناوەندیی وڵاتانی جی 20، ئاماژەی بەوەدا چاوەڕوانییەکانی سندوقی دراوی نێودەوڵەتی و دامەزراوە پەیوەندیدارەکانی دیکە سەبارەت بە پاشەکشەی بەرفراوانی ئابوری جیهانی لە ساڵی 2023دا بەدەستنەهاتووە.
باسی لەوەشکرد، لەبری ئەوە گەشەی ئابووری گەیشتووەتە 3.1%، کە باشتر بووە لەوەی پێشبینی دەکرا، هەڵاوسان دابەزینی بەخۆیەوە بینی، پێشبینیش دەکرێت لەمساڵدا نرخەکان لە نزیکەی 80%ی وڵاتان بەردەوام بن لە دابەزین.
ئەو وەزیرە ئاماژەی بەوەشکردووە، لە داهاتوودا بەردەوام دەبن لە رەچاوکردنی مەترسییەکانی بەردەم ئابوری جیهانی و چاودێریکردنی ئاستەنگە ئابورییەکانی هەندێک وڵاتی سەربەخۆ، بەڵام ئابووری جیهانی بە جێگیری دەمێنێتەوە.
روونیشیکردەوە کە هەڵاوسان لە ئەمریکاش بە بەراورد بە پێشتربە شێوەیەکی بەرچاو کەمیکردووە، لەگەڵ ئەوەشدا بازاڕی کار بەهێزبووە.
