وەزیری سەرچاوە ئاوییەکانی عێراق رایگەیاند، بارانبارینی چەند رۆژی رابردووی ناوچەکانی هەرێمی کورستان کاریگەری ئەرێنی هەبووە لەسەر کەمکردنەوە و قەرەبووکردنەوەی ئەو کورتهێنانەی لە یەدەگی ئاویی عێراقدا هەبوو.
عەون زیاب عەبدوڵا وەزیری سەرچاوە ئاوییەکانی عێراق لە لێدوانێکدا ئاماژەی بەوەکردووە، بارانبارین و لافاوی ناوچەکانی هەرێمی کوردستان کاریگەری ئەرێنی لەسەر یەدەگی ئاویی ستراتیژی هەیە.
راشیگەیاند، باران و لافاو قەرەبووی کەمیی یەدەگە ستراتیژییەکان دەکاتەوە و یەدەگی ئاوی ستراتیژی لە بەنداوەکاندا وردە وردە زیادی کردووە و دۆخی ئاوی هاوینی داهاتوو باشتر دەبێت لە پێشووتر بە دابینکردنی پێداویستییەکانی ئاوی پێویست.
هاوکات، ئەوەشی خستەڕوو، دوو بەنداو لە پارێزگاکانی ئەنبار و کەربەلا دروستدەکرێن کە پشت بە ئاوی باراناو دەبەستن.
