قوباد تاڵەبانی، جێگری سەرۆك وەزیرانی هەرێم پێشوازیكرد لە دەیڤید بێرگەر هەڵسوڕێنەری كاروباری باڵیۆزخانەی ئەمریكا لە عێراق و لە كۆبوونەوەی نێوانیاندا دۆخی ئەمنیی عێراق و كوردستان و ناوچەكە تاوتوێكران.
لە كۆبوونەوەكەدا كە رۆژی چوارشەمە لە شاری هەولێر بەڕێوەچوو و تیایدا مارك سترۆ كونسوڵی گشتیی ئەمریكا لە هەرێم ئامادەیبوو، جەختكرایەوە لەسەر گرنگیی پاراستنی سەقامگیریی عێراق و هەرێمی كوردستان و هەردوولا هاوڕابوون لەسەر ئەوەی پێویستە هەموو لایەنەكان هەستیاریی دۆخەكە لەبەرچاو بگرن، چونكە هەرجۆرە گرژی و هەڵوێستێكی نادروست دەتوانێت سەقامگیریی عێراق و كوردستان و ناوچەكە بخاتە مەترسییەوە.
لە كۆبوونەوەكەدا جێگری سەرۆك وەزیرانی هەرێم ئاماژەی بەوەدا، “هێشتا مەترسییەكان لەسەر عێراق و كوردستان بەردەوامە”.
لە تەوەرێكی دیكەی كۆبوونەوەكەدا باسی هەڵبژاردنەكانی داهاتووی پەرلەمانی كوردستان كرا و قوباد تاڵەبانی جەختیكردەوە كە پێویستە بە زووترین كات بڕیار لەسەر بەڕێوەچوونی هەڵبژاردنەكان بدرێت و لە ماوەیەكی نزیكی داهاتوودا هەڵبژاردن بە شێوەیەكی پاك و بێگەرد و دادپەروەرانە بەڕێوەبچێت.
