ئەندامێكی لیژنەی دارایی لە ئەنجومەنی نوێنەرانی عێراق رایدەگەیەنێت، راگرتنی مووچە و بودجەی هەرێمی كوردستان لە دەسەڵاتی وەزیری دارایی عێراق نییە و دەشڵێت، ” سبەی دوا وادەیە بۆ ناردنی 618 ملیار دینارەكە”.
د. جەمال كۆچەر ئەندامی لیژنەی دارایی لە ئەنجومەنی نوێنەرانی عێراق لە دیدارێكی تەلەفزیۆنیدا رایگەیاند، پێشتر ئەنجومەنی وەزیرانی عێراق بەشە بودجەی هەرێمی كوردستانی پەسەندكردووە نەك مووچە و سبەی دوا وادەیە بۆ ناردنی 618 ملیار دینارەکە بۆ هەرێمی كوردستان.
وتیشی، “راگرتنی مووچە و بودجەی هەرێمی كوردستان لە دەسەڵاتی وەزیری دارایی عێراقدا نییە، چونكە پێشتر ئەنجومەنی وەزیرانی عێراق بڕیاریداوە ئەو بڕە پارەیە بنێردرێت و دەبێت وەزارەتی دارایی عێراق پابەندی بڕیارەكە بێت”.
ئەندامەكەی لیژنەی دارایی لە ئەنجومەنی نوێنەرانی عێراق جەختیكردەوە و وتیشی، “پێویستە هەرێمی كوردستان لیستی مووچەخۆرانی پاكبكاتەوە بۆ هەمواری یاسای بودجەش چاوەڕواندەكرێت لە مانگی داهاتوودا ئاراستەی ئەنجومەنی نوێنەرانی عێراق بكرێت”.
