وەزیری دارایی هەرێم رایدەگەیەنێت، لە یاسای بودجەدا ستەم لە هەرێمی كوردستان كراوە و لەسەر هەمواركردنەوەی لەگەڵ حكومەتی عێراق رێككەوتووین.
ئاوات جەناب نوری، وەزیری دارایی و ئابوریی هەرێم لە لێدوانێكدا رایگەیاند، ووردبینی بۆ داتا و زانیارییەکان کراوە و وەزارەتی دارایی و ئابوریی هەرێم هەموو رێکارەکانی جێبەجێکردووە.
وتیشی، “یاسای بودجە ستەمێکی گەورەی لە هەرێمی کوردستان کردووە، حکومەتی فیدراڵیش درکی بەو ستەمە کردووە، لە گفتوگۆکانی ئەم دواییەی نێوانمان لەسەر هەموارکردنەوەی یاساکە رێککەوتووین”.
گەیشتنی بڕی پێویستی پشكی هەرێم بەستراوەتەوە بە هەمواری چەند بڕگەیەك لە یاسای بودجەی گشتیی عێراق، كە پێشتر دەوترا لە سەرەتای ئەمساڵ و لەگەڵ دەستپێكردنەوەی كارەكانی ئەنجومەنی نوێنەران ئەنجامدەدرێت، بەڵام تائێستا هەمواركردنەوەكە دواخراوە.
بۆ چارەسەری ئەو گرفتەش حكومەتی عێراق بڕیاریدا بۆ ئەم مانگە 618 ملیار دینار بۆ هەرێمی كوردستان رەوانە بكات، بەڵام تائێستا سەرەڕای نزیكبوونەوەی ئەم مانگە لە كۆتاییەكەی پارەكە رەوانە نەكراوە، ئەوەش لەكاتێكدایە دوا مووچەی دابەشكراو لە هەرێم مووچەی مانگی ئەیلولی ساڵی رابردووە و تائێستا چارەنووسی سێ مووچەی ساڵی رابردوو و مووچەی ئەم مانگە نادیارە.
دوێنێ نەرمین مەعروف، ئەندامی لیژنەی دارایی ئەنجومەنی نوێنەرانی عێراق رایگەیاند، بڕیاردرا لەسەر پێكهێنانی لیژنەیەكی تایبەت لە ئەندامانی لیژنەی دارایی ئەنجومەنی نوێنەران.
وتیشی، “كاری ئەو لیژنەیە بەدواداچوون و پێشكەشكردنی راپۆرتێكی بەپەلەیە لەبارەی رێكارەكانی وەزارەتی دارایی فیدراڵ بۆ خەرجكردنی شایستە داراییەكانی هەرێم بە تایبەتی لە دوای بڕیاری ئەنجومەنی وەزیران بە تەرخانكردنی بڕی 618 ملیار دینار بۆ مووچەی مانگی یەكی فەرمانبەرانی هەرێم لە ساڵی 2024، و ئاستی جێبەجێكردنی پابەندییەكانی سەر هەرێم لە یاسای بودجەدا”.
