زانایان باوەڕیان وایە، پەیوەندییەك هەیە لەنێوان تەمەن درێژی و خواردنەوەی چا، بەڵام ئەمەش دەگەڕێتەوە بۆ “رێژەی نمونەیی”.
بەپێی توێژینەوەیەك رۆژانە خواردنەوەی سێ كوپ چا دەبێتەهۆی دواخستنی “پیریی بایۆلۆجی”. دەشڵێن، چای رەش كانزای پەیوەندیدار بە تەندروستیی دڵ، مێشك و گەدەی تیایە.
توێژەرانی زانكۆی سیچوان لە چنگدۆ-ی چین تاوتوێی زانیارییەكانی پێنج هەزار و 998 بەریتانی تەمەن نێوان 37 بۆ 73 ساڵ و، حەوت هەزار و 931 چینیی تەمەن نێوان 30 بۆ 79 ساڵ كرد و گەیشتنە ئەو ئەنجامەی، ئەو كەسانەی چایان خواردووەتەوە نیشانەكانی “خاوبوونەوەی پیریی بایۆلۆجی”یان تیابەدیكراوە.
توێژەران دەڵێن، خواردنەوەی نزیكەی سێ كوپ چا یان 6 تا 8 گرام چا رۆژانە، سوودی بەهێزتری لە رووبەڕووبوونەوەی پیری دەرخستووە.
روونیشیدەكەنەوە، بۆلیفینۆل كە لە ناو چا-دا هەیە، كاریگەریی گرنگی هەیە لەسەر رێكخستنی گۆڕانكارییەكانی پەیوەست بە تەمەن، ئەركە ژیرییەكان و میتابۆلیزم (واتە كرداری گۆڕینی خۆراك بۆ وزەی پێویستی لەش).
