لەماوەی چەند رۆژی رابردوودا پڕۆسەی خوێندن لە زۆرێک لە خوێندنگەکانی سەنتەری سلێمانی و قەزاو ناحیەکانی دەوروبەری دەستیان پێکردووەتەوە و بەردەوام ژمارەی خوێندنگەکان لە زیادبووندان.
سەرچاوەیەک لە بەڕێوەبەرایەتی پەروەردەی سلێمانی بە تۆڕی میدیایی ئێستای راگەیاند، لەماوەی چەند رۆژی رابردوودا زۆرینەی خوێندنگەکان لە سەنتەری شاری سلێمانی کراونەتەوە و پڕۆسەی خوێندن دەستی پێکردووە.
هاوکات، پەروەردەی کەلاریش دوێنێ داوای لە دایک و باوکان کرد، منداڵەکانیان بنێرنەوە بەر خوێندن بەهۆی ئەوەی دەرگای خوێندگەکان کراونەتەوە و دەوام ئاساییە تێیاندا.
جگە لەوەش، لە پەروەردەکانی هەڵەبجە، شارەزوور، دووکان، راپەڕین، ناوچەکانی دیکەی دەڤەری گەرمیان و پەروەردەی چەمچەماڵ، خوێندن لە زۆرینەی خوێندنگەکان دەستی پێکردووەتەوە و وەک ئەوەی لە گرتەڤیدیۆییەکان دەردەکەوێت کە لەلایەن پەروەردەکانەوە بڵاوکراونەتەوە لە تۆڕە کۆمەڵایەتییەکان، خوێندکاران بە کردنەوەی دەرگای خوێندنگەکان و چوونەوەیان بۆ خوێندن دڵخۆشن.
