پارێزگاری هەولێر رایدەگەیەنێت، لە 48 كاتژمێری داهاتوو رێگای كاتیی دەربەندی گۆمەسپان تەواودەبێت و بۆ شۆفێران دەتوانن ئەو رێگایە بەكاربهێنن.
ئومێد خۆشناو، پارێزگاری هەولێر رایگەیاند، ئەو ڕێگایەی ئێستا هەیە لە دەربەندی گۆمەسپان كە لە ماوەی چەند رۆژی رابردوودا بەهۆی بارینی ڕێژەیەكی زۆری باران و كۆبوونەوەی ئاوی بەنداوی دەربەندی گۆمەسپان كەوتبووە ژێرئاو، ئێستا ئاستی ئاوەكەی دابەزیوە و هاتوچۆ تێیدا ئاسایی بووەتەوە.
وتیشی، لە 48 كاتژمێری داهاتوودا رێگایەكی دیكەی نوێی دەربەندی گومەسپان تەواودەبێت بۆ هاتوچۆكردنی هاوڵاتییان.
ئاشكراشیكرد، ئێستا ڕێگایەكی كاتی لەلایەن كۆمپانیای جێبەجێكاری پڕۆژەی دروستكردنی دەربەندی گۆمەسپان دروستدەكرێت كە بڕیارە لە 48 كاتژمێری داهاتوو كارەكانی تەواوبێت و بۆ هاتوچۆ بەكاربێت، بڕیاریشە تا ساڵێكی دیكە، رێگایەكی دیكەی سەرەكی بە درێژیی سێ كیلۆمەتر لە ڕێگا ئێستای بەنداوەكە و دوورتر دروستبكرێت، لەبەر ئەوەی ئەو رێگا كۆنەی كە ئێستا هەیە دەكەوێتە ژێر ئاو و، چیتر هاتوچۆی لێناكرێت.
