بانکی نێودەوڵەتیی جیهانی پشتیوانی خۆی بۆ رێکارەکانی حکومەتی عێراق لە پەرەپێدان و نوێکردنەوەی کەرتی بانکی و پەیڕەوکردنی شێوازی پارەدانی ئەلیکترۆنی لە وڵاتەکە راگەیاند.
ئەمڕۆ چوارشەممە، نوسینگەی راگەیاندنی سەرۆک وەزیرانی عێراق بڵاویکردەوە، سودانی لە داڤۆس لەگەڵ ئەجای بانگا سەرۆکی بانکی نێودەوڵەتی کۆبووەوە و تێیادا پەیوەندییەکانی نێوان عێراق و بانکی ناوەندی تاوتوێکراون.
بە گوێرەی راگەیەندراوەکە، سەرۆکی بانکی نێودەوڵەتی پشتگیری خۆی بۆ هەنگاوەکانی حکومەتی عێراق دووپاتکردووەتەوە و بە کارئاسانی بۆ بنیادنانی وەبەرهێنان و گەشەسەندنی زیاتری عێراق ناوی بردووە.
محەمەد شیاع سوانی سەرۆکی ئەنجومەنی وەزیرانی عێراق جەختی لە بەردەوامی هەنگاوەکان کردووە لە کەرتی ئابووری و بانکی و پاڵپشتیکردنی کەرتی تایبەت، کە ئامانجیان هەمەچەشنکردنی ئابووری و زیادکردنی گەشەسەندن و بەدەستهێنانی سەقامگیری داراییە لە ژێر رۆشنایی ئەو ئالنگارییانەی رووبەڕووی ناوچەکە و جیهان دەبنەوە.
