سەرۆكی هەرێمی كوردستان رایدەگەیەنێت، هەوڵەكانمان بەو ئاراستەیەن چارەسەری ریشەیی كێشەی مووچەی مووچەخۆرانی هەرێمی كوردستان بكەین و ناكرێت بابەتی مووچە بكرێتە كارتێكی گوشار لەسەر هەرێمی كوردستان.
نێچیرڤان بارزانی سەرۆكی هەرێمی كوردستان لە كۆنگرەیەكی رۆژنامەوانیدا لە شاری بەغداد رایگەیاند، هەوڵدەدەین كێشەكان لەگەڵ بەغداد چارەسەربكەین و ناكرێت بابەتی مووچە بكرێتە كارتێكی گوشار لەسەر هەرێمی كوردستان و لێكتێگەیشتن هەیە و بە هیواین كێشەی مووچە چارەسەربكرێت.
وتیشی، “سوپاسی خۆڕاگریی مووچەخۆرانی هەرێمی كوردستان دەكەین و هەموو هەوڵێكی حكومەتی هەرێم بەو ئاراستەیەیە لە هەمواری یاسای بودجەدا مووچەی مووچەخۆرانی هەرێم زامنبكرێت”.
لەبارەی هەڵبژاردنی پەرلەمانی كوردستانیش، سەرۆكی هەرێم وتیشی، “وەفدێكی كۆمسیۆن دێتە هەرێمی كوردستان و تاوتوێی دیاریكردنی رۆژی هەڵبژاردن دەكرێت و ئومێدەوارین وادەیەك بۆ هەڵبژاردنی پەرلەمانی كوردستان دیاریبكرێت”.
نێچیرڤان بارزانی بۆ دەستپێكردنەوەی هەناردەی نەوتیش رایگەیاند، لەگەڵ بەرپرسانی بەغداد باسمان لە دەستپێكردنەوەی هەناردەی نەوت كرد و هەموو هەوڵەكان بەو ئاراستەیەن بە زووترین كات هەناردەی نەوت دەستپێبكاتەوە.
بۆ پۆستی پارێزگاری كەركوكیش، نێچیرڤان بارزانی باسی لەوەش كرد كە لەگەڵ یەكێتیی نیشتمانیی كوردستان بۆ پرسی پارێزگای كەركوك گفتوگۆدەكەن و لێكتێگەیشتن لەسەر ئەو پرسە دەكرێت”.
