ستران عەبدوڵا ئەندامی سەركردایەتیی یەكێتیی نیشتمانیی كوردستان لە دیدارێكی رۆژنامەوانیدا رایگەیاند، یەكێتی ئامادەی گفتوگۆیە لەسەر ئاستی هەرێم و عێراق بۆ پرسی كەركوك و ئەنجامەكانی سەربەرزانەیە لەگەڵ ئەوەشدا ھەستیاریی دۆخی كەركوك لەبەرچاودەگیرێت.
وتیشی، ” بنەمای دیموكراسی ئەوەیە دەتوانیت داوای ھەموو شتێك بكەیت، بەڵام ئەمە نابێتە بنەمای دانوستاندێكی بەرهەمدار و ئەو سەنگەی یەكێتی بەدەستیهێناوە دەبێتە بنەمای دانوستانەكانی”.
ستران عەبدوڵا لە دیدارەكەیدا دەڵێت، “یەكێتی پێی باشە كورد پێكەوە بێت دواتر لەگەڵ لایەنەكانی دیكەی كەركوك گفتوگۆبكات و زیانی ئەوەی یەك لیست نەبووین با ببێتە دەرسێك كە بۆ پێكهێنانی ئیدارەی كەركوك كورد بەیەكەوە بێت و دەبێت ھەموو سیناریۆكانمان لەبەرچاو بێت لە كەركوك”.
راشیگەیاند، تا زووتر گفتوگۆ بكرێت باشترە و پێویستە گفتوگۆ لەگەڵ ھەموو لایەنەكانی دیكەی كەركوكدا بكرێت و نەتەوەكان لەناو خۆیان یەكبن گفتوگۆكان ئاسانتردەبێت لە هەمانكاتدا بە روانگەیەكی كوردستانی كەركوكی و عێراقییانە مامەڵە لەگەڵ دۆسیەی ئیدارەی كەركوك بكەین.
ستران عەبدوڵا باسی لەوەشكردووە، “پێكهاتەی توركمان لە رابردوودا هاوپەیمانێكی باشی بۆ خۆی نەدۆزیووەتەوە و كورد لە كەركوك هاوپەیمانێكی باش دەبێت بۆ توركمان و پێشتریش عەرەب لە پارێزگای كەركوك ئیدارەیەكی باشی كەركوكی نەداوە”.
باسی لەوەشكردووە كە سێ بنەما گرنگە ئیستحقاقی هەڵبژاردن و پرەنسیبی چەپكە گوڵەكە و یاسای ھەڵبژاردن كە دەڵیت بە تەوافق ئیدارەی كەركوك بدەن یەكەمی ھەڵبژاردن، پارێزگار وەردەگرێت و بەشی لایەنەكانی دیكە دەدات ئەوە تەوافوكەكەیە لە كەركوك و چەپكە گوڵەكە مەبدەئی جەنابی مام جەلالە كە ئیدارەی كەركوكی پێبدەین و سەرۆكی یەكێتیی كە خۆی ئیدارەی تیمی دانوستاندنی یەكێتی دەدات وتی، “ئێمە تاك لایەنە حوكم ناكەین و ھەموو لایەنەكان بەشداریی پێدەكەین لە ئیدارەدانی كەركوكدا”.
ئەو سەركردایەتییەی یەكێتی دەشڵێت، “بابەتی كەركوك پێویستە ھەموو رەھەندەكانی بخوێندرێتەوە و لەبەرچاو بگیرێت یەكێتی لە كەركوك جێگای متمانەیە و ئەو متمانەیە هەرگیز لەدەستنادەین و سەركردایەتی یەكێتی لەو روانگەیەوە سەیردەكات كە دۆسیەی كەركوك زۆر گرنگە بۆیە وزە و هەموو جۆش و خرۆشی خۆی خستەگەر بۆ داهاتوو روومان لە ھەڵبژاردنی پەرلەمانی كوردستانە، دەبێت یەكێتی ئەم جۆش و خرۆشە بیگوازێتەوە بۆ ھەرێمی كوردستان، بۆ ئێمە كوردستان هەر یەكە با تایبەتمەندی هەبێت و ئاستی گەشەی سیاسیی جیاواز بێت”.
ئاماژەی بۆ ئەوەش كرد، ئەو هەڵمەتی مۆدێلەی یەكێتی لە كەركوك كە مۆدیلێكی یەكێتییانە و كوردستانییە کە بیگوازێتەوە بۆ شارەكانی ھەولێر و سلێمانی و ھەموو شارەكانی هەرێم و لەوێش بیبەینەوە و مژدەبێت بۆ یار و نەیار لە هەڵبژاردنی هەرێمیش بە نەفەسی بوژانەوەی یەكێتیی سەركەوتوو دەبین.
