کۆمپانیای هێڵی ئاسمانی بڕۆکسڵ رایگەیاند، “نزیکەی 80٪ی گەشتە ئاسمانییەکان کە بڕیاربوو ئەمڕۆ ئەنجامبدرێت، هەڵدەوەشێنەوە، ئەوەش بەهۆی مانگرتنی لەناکاوی فڕۆکەوانان و تیمە گەشتیارییەکانەوە.
لە بەیاننامەیەکدا وتەبێژی هێڵی ئاسمانی بڕۆکسڵ ئاماژەی بەوە کردووە، “نیگەرانین لە بانگەوازی سەندیکاکانی فڕۆکەوانان بۆ مانگرتنی لەناکاو و بانگهێشتیان دەکەین کە لەگەڵمان بن لەسەر مێزی گفتوگۆ بۆ بەردەوامبوون و رێگریکردن لە زیانەکان”.
پێشتر سێ سەندیکای فڕۆکەوانان بانگەوازی مانگرتنێکی 24 کاتژمێرییان کرد کە لە بەیانی ئەمڕۆ شەممەوە دەست پێدەکات و داوایان کرد ئەو یارمەتییانەی لە مووچەدا جێگیرنەکراون، پەیوەست بکرێنەوە بە بارودۆخی هەڵاوسان و زیادبکرێن.
سەندیکایەکی دیکە داوای لە تیمەکانی کابینەکەی کردووە بەشداری مانگرتنی فڕۆکەوانەکان بکەن بۆ ئەوەی داوای زیادکردنی مووچە و باشتر دابەشکردنی کاتەکانی کارکردن بکەن.
پێشتریش کۆمپانیاکە لە مانگی حوزەیرانی 2022دا رووبەڕووی مانگرتنێکی گەورە بووەوە کە فڕۆکەوانەکان و کارمەندانی تیمی فڕۆکەوانی لەخۆگرتبوو و گەشتەکانی ئەو وڵاتەی بە تەواو پەکخست.
