یاریدەدەری سەرۆكی حكومەتی هەرێم رایدەگەیەنێت، مووچەی مووچەخۆرانی هەرێم دەبێت لە بەغدادەوە دابینبكرێت، بەو پێیەی هەناردەی نەوتی هەرێم لەلایەن حكومەتی عێراقەوە راگیراوە و دەشڵێت، “ئەگەر ئەنجومەنی وەزیرانی عێراق لە كۆبوونەوەی داهاتوویدا هەمواركردنەوەی یاسای بودجە پەسەندبكات ئەوە كێشەكە چارەسەردەبێت ئەگەر نا داوامانكردووە لە بودجەی 2024 لەگەڵ دابەشكردنی مووچە لە عێراق سولفەیەك بۆ هەرێمی كوردستان بنێردرێت”.
وتیشی، “هیچ حكومەتێك نییە پارەی لەبەردەستدا بێت و مووچە دابەشنەكات و ئەوەی دەوترێت بە داهاتی ناوخۆ دەتوانرا مووچەیەك دابەشبكرێت هیچ بنەمایەكی نییە و دوورە لە راستییەوە، چونكە ئێمە بۆ داهات پشتمان بە فرۆشتنی نەوت بەستووە و لە ساڵی رابردووەوە هەناردەی نەوت لە لایەن عێراقەوە راگیراوە بۆیە مووچەی مووچەخۆرانی هەرێم دەبێت لە بەغدادەوە دابینبكرێت و لە ئێستاشدا لێكتێگەیشتن لەسەر پرسی نەوت لە نێوان هەرێم و بەغداد هەیە”.
