پۆلیسی دهۆک دەستگیرکردنی کەسێکی راگەیاند و دەڵێت، “هەڕەشەی لە 230 کچ و ژن کردووە و داوای ڤیدیۆ و وێنەی لێکردوون.”
هێمن سولەیمان وتەبێژی بەڕێوەبەرایەتی پۆلیسی دهۆک رایگەیاند، تۆمەتبارەکە کە تەمەنی 28 ساڵە، لە رێگەی پێنج پەڕەی تۆڕی ئینستاگرامەوە هەڕەشەی لە 230 کچ و ژن کردووە ئەگەر وێنە و ڤیدیۆی زیاتری بۆ نەنێرن ئەوا وێنە و ڤیدیۆیان بڵاودەکاتەوە.
وتەبێژەکەی پۆلیسی دهۆک باسی لەوەکردووە، کاتێک چاویان بە مۆبایلی تۆمەتباردا خشاندووەتەوە، تەواوی بەڵگەکان دۆزراونەتەوە و سزای ئەم تۆمەتبارە دەگاتە پێنج ساڵ بەندکردن و سزای پێبژاردنی دارایی تاوەکو پێنج ملیۆن دینار.
هێمن سولەیمان باسی لەوەشکردووە، دوای ئەوە چەند سکاڵایەکی لەسەر تۆمارکراوە، چاودێری کراوە و دەستگیرکراوە و دەرکەوتووە کە پێشینەی تاوانیشی هەبووە.
