وەزارەتی ئەوقاف و کاروباری ئاینیی هەرێم رایگەیاند، “لەمەودوا بە زمانی شیرینی کوردی رێنوێنی پێشکەشی حاجیان و عومرەکاران دەکرێت”.
لە راگەیەندراوێکدا وەزارەتی ئەوقاف و کاروباری ئاینیی هەرێمی کوردستان ئاماژەی بەوەکرد، “وەفدێکی بەڕێوەبەرایەتیی گشتیی حەج و عومرە لە شاری جەدەی سعودیە کە بە بەشداری وڵاتانی ئیسلامی بەڕێوەچوو، بەشداری کۆنگرە و پێشانگای حەج و عومرەی کرد، کە تێیدا تاوتوێی رێکارە گرنگەکانی خزمەتکردنی میوانانی ماڵی خوا کرا و باشترین ڕێگاکان لەو بارەیەوە دەستنیشانکران”.
ئەوەشی خستووەتەڕوو، “لە ھەنگاوێکی گرنگدا و لەمیانی بەڕێوەچوونی کۆنگرەکەدا، وەزیری کاروباری حەج و عومرەی سعودیە رەزامەندیدا لەسەر زیادکردنی زمانی شیرینی کوردی بۆ رێنماییەکانی حەج و عومرە”.
دەشڵێت، “وەک ھەر زمانێکی تری نێودەوڵەتی، ئەم ھەنگاوە دەستکەوتێکی گرنگە بۆ خەڵکی کوردستان و حاجیان و عومرەکاران”.
